"KABARET NGARONDA"
MANG PELAY NAEK KA PANGGUNG, DISOLENDANG SARUNG, DIKOPEAH, DIKAMPRET+CALANA KOMPRANG BARI NAKOLAN KOHKOL KUKURILINGAN, LAHA-LOHO, ALAK-ILIK BARI GERA-GERO.
Ronda………Ronda…………Ronda……….. (Trak Trok Trak Trok)
Barade yeuuuh …… ronda gandang ……(Trak Trok Trak Trok)
Barade yeuuuh …….ieu mamang ronda gaya (Trak Trok)
Rangu jeung haneut keneh ……………….. (Trak Trok Trak Trok)
Hooy ……………………. Dulur!! Dulur!! Sakur nu aya dilembur!!!
Tanghi……….tanghi……….tanghi………..
Boh nu keur di dapur !! Boh nu keur dina kasur !!
Bisi aya laming !! Eh maling nyiliwuri !!!
Tah boa dina para !!
Sok toong bisi dina para !!
Ulah kajongjongnan teuing !!
Taranghi ………tanghi …….. taranghi tanghi !
Memeh sare sing tarapti !!
Kade panto kudu dikolotok! ! Jandela kudu ditulakan !!
Komo nu boga parawan !! Aduh haling hileung !!
Kade bisi aya nu ngaronom !!
(Trak Trok Trok Trak)
MANG PELAY ALAK-ILIK BANGUN AYA NU DITEANGAN
Mang pelay : Ah! ! Euweuh batur ieu teh ??? Kamarana atuh nu sejena
Ah rek dicalukan tibeh dieu !!! Jaleuleu ..............
Ih euweuh gening?
Jaleuleu ............................
SABOT MANG PELAY KEUR NYALUKAN, TEU LILA MANG PEANG DATANG BARI NENJRAG NGAHOYAHKEUN MANG PELAY (JAA!!). MANG PELAY REUWAS, TULUY NGURUT DADA
Mang Pelay : Astagfirulloh! !! Naa…. Ari maneh !! Deleka pisan !! Ieu jantung asa ek coplok !! Gagabah geuning !! Kumaha lamun jantung urang murag ?! Kapan nyaho urang teh boga panyakit jantung !!
Mang Peang : Ha……………Ha……………Ha……………..Ha…….. Moal !!!!!!!
Tapi teuing isukan mah !!!???
Mang Pelay : Lain ……… ieu teh kuring asa tunduh pisan !!! Cik kumaha lamun giliran sare ?? Tong lila-lila sajam ewang !!
Mang Peang : Enya atuh sok suten dibilang nepi ka 20 !!
DUANANA SUTEN, NU MENANG MANG PELAY NONG KNONG DITAKOL !!
MANG PELAY MORONGKOL MANG PEANG NANGTUNG KULIAT, BABATEK, TULUY LAHA-LOHO, ALAK-ILIK NGILIKAN KAAYAAN. TEU LILA TERUS DIUK DEUI BARI TERUS MILANG 1……2……...3……… JEUNG SATERUSNA NEPIKA 20. KNONG DITAKOL DEUI (NONG.......NONG) TAPI ANGGEUR MANG PELAY TEU DAEK HUDANG MANG PEANG KEUHEL, TULUY KENONGNA DITAKOL KEREP KANA DEUKEUT CELI MANG PELAY (NONG…….NONG……) MANG PELAY GURA-GIRU HUDANG BARI TULUY GIGISIK KANA PANON ………….HEUUUAAYYY…..!
Mang Peang : Giliran kuring nu sare !!
Mang Pelay : Enya ......Sok,........ !
BARI TERUS NAKOL KNONG (NONG)
MANG PEANG SARE MORONGKOL, MANG PELAY CUNGAR-CENGIR BARI SAKAPEUNG NGARERET KANA BEUNGEUT MANG PEANG, SAKAPENG SEURI KA PANONTON ............... TERUS MILANG NEPI KA10 (NONG) KNONG DITAKOL KANA DEUKEUT CEULI MANG PEANG, BARI TERUS NYARITA:
GES SATENGAH JAM (CEK MANG PELAY)
MANG PEANG HUDANG, MANG PELAY MORONGKOL......MANG PEANG MAH BENER MILANGNA NEPI KA 20. (NONG) KNONG DITAKOL ......GILIRAN MANG PELAY NU NYARING TAPI LICIK MILANGNA NEPI KA 5, (NONG) KENONG DITAKOL ....GILIRAN MANG PEANG NU NYARING ANGGER 20 (NONG ) KENONG DITAKOL ....GILIRAN MANG PELAY NU NYARING, TAPI ANGGER LICIK DEUI. MILANG UKUR NEPI KA 3 KNONG DITAKOL. BARI TERUS KNONGNA DISUMPUTKEUN KANA JERO BEUTEUNGNA (DIKEUKEUPAN) ATUH MANG PEANG KOKOTETENGAN NEANGAN KNONG. LILA-LILA KAPIKIR ETA KNONG PASTI DISUMPUTKEUN KU MANG PELAY. TUNGTUNGNA MANG PELAY DIGUYAH-GUYAH BARI BARI DI RAH-RAHAN BEUTEUNGNA TERUS JOGOL MAREBUTKEUN KNONG.
Mang Peang : Licik euy manehmah !! Teu kaci !!
Teu adil kitu mah .................... sok hiji ewang ayeuna mah kenongna !!
MASING-MASING NYEUKEUL KNONG HIJI EWANG ACARA KEMIT GILIRAN DIBALIKAN DEUI SAPERTI NU TADI, BEUKI LILA BEUKI KEREP (SARE-CANDUKUL, SARE CANDUKUL, TUNGTUNGNA TERUS NARANGTUNG BARI TERUS JOGED). BARANG KEUR JOGED UJUG-UJUG AYA SORA HAYAM KEKEOKAN (Keoooook...........Keooooook......) DISAMBUNG KU SORA NU RAME (Maling ..........Maling............Maling ...............) SABOT KEUR RAME KITU, LAR AYA NU DATANG, NGALIWAT, NYA NU DATANG TEH MANG DUYEH. DUANNANA REUWAS TEU ANTARAPAH DEUI ETA NU DATANG TEH DITALIPUKKAN KU DUAAN DITAJONGAN. MANG DUYEH AMPUN-AMPUNAN BARI SOSOLONTODAN BREK ......NGAJOPRAK TEU WALAKAYA SABOT KEUR NALIPUKAN TOROJOL DATANG PAK RT BARI NIUP PIRIWIT PANJANG PISAN (Priiiiiiiiiiiiiiittttttttt.......!)
Pak RT : Aya naon ieu teh ??! Geuning aya jelema disiksa kieu ???
PAK RT BARI TIPORONGOS
Mang Pelay : Kieu Pak RT ......... sakari-kari ieu jalma ngaliwat, aya sora hayam kokoekan, terus rea nu cocorowokan maling-maling, nya moal saha deui atuh lamun lain ieu mangkelukna !!
BARI TERUS NAJONG MANG DUYEH
Mang Peang : Bener !! Pur kuntul kari kuntul !!
Lar gagak tinggal tunggak
Moal nyiar jurig teu kadeuleu !
Tah nu kieu ......... nu disebut jurig nu nu teu kadeuleu teh !!!
BARI TERUS NALIPUKAN DEUI KA MANG DUYEH
Mang Duyeh : Ampuuuuuaan !!!!!!!! Ampuuuuuuaan !!!!!!!!!!!!!
Tulung !!! ...........Lutung ...........Lutung ...............!!!! Lutung ..............!!!
Teu rumasa laming !!! Kuring mah teu rumasa laming !!!
Lutung !!! Bapa ReTe !!! Lutuuuuuung ........!!!!!!!!!
ReTe lutung !!! Lutung ReTeeeee........!!!!!
MANG DUYEH GOGOROWOKAN BARI MORONGKOL
BAPA RT NGAMBEK BARI TERUS NIUP PIRIWIT DEUI KEREP BARI TARIK PISAN
Pa RT : (Priit !! Priit !! Priiiiit ......!!) 2x
Rek eureun moal ??
BARI MULAK CANGKENG
Yeuuuh !! Sing eling atuh maraneh teh !
Ieu teh nagara hukum deuleu !!
Teu bisa maen hukum sorangan !!
Lalawora geuning ? kumaha lamun terus paeh ?
Pan urang nu katempuhan lin ??
Najan dina eunyana oge !!
Jalma eta bener malingna !!! matak naon tewak wae terus serahkeun kanu berwajib !!!! Lain disiksa kieu !!
Sing puguh atuh !! Dapon gampleng bae !!
Hayooh hudangkeun !!
RONDA NGAHUDANGKEUN MANG DUYEH (DITANGTUNGKEUN) MANG DUYEH NANGTUNG BARI PEUREUM. GEUS AJEG NGAGUDUPRUK DEUI. DITANGTUNGKEUN DEUI AJEG. NGAGUDUPRUK DEUI. NGULAPES NONGGENG. BRUUUT...HITUT GEDE PISAN (NU TILUAN NARUTUP IRUNG)
MANG DUYEH CULANG-CILEUNG TERUS NGUSAPAN AWAKNA JEUNG SIRAHNA BARI HUMARERUNG BANGUN NYERI
Mang Duyeh : Haruuuh ........... halah ieung ............. nyeriiiii ..................... !!!!!
Pa RT : Mang !!! Geus eling can ??!
BARI NGAHUDANGKEUN MANG DUYEH SUPAYA NANGTUNG
Mang Duyeh : Parantos Agaaann !! ngan ieu awak laleuleus keneh .........
Pa RT : Enya ! wayahna wae mang ....... nyeri-nyeri oge jawab heula pertanyaan kuring !!!
Hiji : mang teh saha ngaran ?
Dua : timana asal ?
Tilu : tos timana ? Atawa arek kamana ? pangna mamang nepi ka dieu?
MANG DUYEH NERANGKEUN SAKABEH PERTANYAAN RT. BARI NYEBUTKEUN MANEHNA KEUR LUNTA REK NYIAR PAGAWEAN KA KOTA. NGAN HANJAKAL KABURU DITALIPUKAN KU IEU RONDA
Pa RT : Oh kItu ??! Enya kaharti ari kitu mah !!
Jung atuh rek ka kota mah !! hampura barudak kuring nya mang !!
Mang Duyeh : Muhun Agaann.....
BARI DODONGKOAN
Haturnuhun abdi disalameutkeun gaaan .........
Pa Rt : Enya !! Jig .........sing salamet !!
MANG DUYEH NGALEOS BARI DODONGKOAN TERUS KALUAR TI PANGGUNG. SAMEMEH KALUAR TI PANGGUNG, MANG DUYEH NGURILINGAN HELA BAPA RT BARI DODONGKOAN, SAKAPENG-KAPENG NGARERET KA BAPA RT TERUS HORMAT BARI NYERENGEH SEURI BARI TERUS KALUAR TI PANGGUNG.
BAPA RT GOGODEG BARI GEUGEUREUNDEUNGAN
“emh.............dasar...............Duyeh.............”
CEUK BAPA RT.
TEU LILA BAPA RT LUAK-LIEUK SEMU AYA NU DITEANGAN, TERUS NGAGOROWOK.
Bapa RT : Hooy!! Hooy!! Hooy!! Ronda!! Dimana ilaing teh euy???
Dasar ronda donge!! Ontolohod!!
BARI TERUS KUKURILINGAN, TUNGTUNGNA KALUAR TI PANGGUNG.
Belum ada tanggapan untuk "CONTOH DRAMA KOMEDI SUNDA"
Posting Komentar